Ginpasugtan sigon si Vice President Sara Duterte nga magsumite it anang kaugalingon nga bag-ong litrato sa baylo nga magpaidaeum sa kaeabanan nga ginahimo nga police mugshot kat magpiyansa sa tatlong kasong grave threats.
Suno kay dating Integrated Bar of the Philippines president Atty. Domingo “Egon” Cayosa, nakabaehag sa sangka Supreme Court circular nga kinahangean nga magsumite ro mga naga-piyansa it ap -at nga kopya it kinahangeanon nga litrato nga bo-oe sa atubang ag magtimbang nga kilid it itsura.
Ginpaathag ni Cayosa nga pwedeng boe-an it litrato ro akusado sa estasyon it pulis ukon sa korte. Apang kon boluntaryong nagsurender ro sangka akusado ag mag-post it piyansa, pwede kara nga daehon ro anang kaugalingon nga latest nga litrato basta nga sueod raya sa gintaeana nga requirements.
Ginpahayag man ni Cayosa nga raya hay bukon it espesyal nga pribilehiyo para kay Duterte bangud nga pareho man ro prosesong ginasunod sa ibang akusadong boluntaryong nagsurender sa korte. Personal nga nag-agto ro bise presidente sa Quezon City Regional Trial Court ag nag-post it piyansa ko Setyembre 5 angot sa tatlong kasong grave threats, nga mga bailable offense.
