Gin-aprubahan it Senado sa pangatlong pagbasa, sa botong 13-5-0, ro Senate Bill No. 2387 nga maga-taeana sa limang dag-ong termino it mga opisyal it Barangay ag Sangguniang Kabataan (SK).
Bangud sa nasmabit nga proposisyong laye nga gindihon ni Senator Francis “Chiz” Escudero, maga-angkon it bag-ong electoral cycle ag maga-resulta raya sa pagpa-iway it nakataeana kunta nga Barangay ag Sangguniang Kabataan Elections (BSKE) sa Nobyembre 2026 paadto sa Nobyembre 2028.
Suno kay Escudero, tuyo it proposisyong nga mag-angkon it mas sigurado ag maayos nga sistema sa lokal nga gobyerno agud malikawan ro pauman-uman nga pagpa-iway it eleksyon kada naga-dungan raya sa pambansang botohan.
Apang, ginpamaeabagan raya it pilang senador kapareho nanday Senator Tito Sotto ag Joel Villanueva, nga naga-pamilit nga ro uman nga pagpa-iway it BSKE hay posibelng mag-eabag sa Saligang Batas ag mag-uyang sa haeos P8 bilyong nalistang gastos it Comelec para sa pagpahaom sa eleksyon makaron nga dag-on.
Pumasa eon man sa pangatlong pagbasa ro kaparehong proposisyon sa House of Representatives, kaya nakataeana eon lang rayang ipasaidaeom sa bicameral conference committee antes isumite sa Malacañang para sa pirma ni Pangueong Ferdinand Marcos Jr.
