Nagnaba ro numero it mga pamilyang naka-eksperyensiya it kaeabanan nga krimen ukon common crimes sa nasyon ko buean it Hunyo, apang nagsaka man sa pinakamataas nga lebel ro mga biktima it cybercrime, suno sa pinaka-ulihing survey it Social Weather Stations (SWS).
Sa ginpatigayon nga survey umpisa Hunyo 20 hasta 29, 10 porsyento it mga pamilya ro naghambae nga naka-eksperyensiya sanda it mga kaeabanan nga krimen sa nagtaliwan nga an-um nga buean, mas manaba sa 12.3 per cent ko Marso.
Samtang, nag-abot sa 8 porsyento ro mga pamilyang naka-eksperyensiya it cybercrime, halin sa 5.8 per cent ko Marso.
Pinakamabahoe ro gintaas sa Metro Manila kun sa siin nag-abot sa 13.4 per cent ro cybercrime victimization, samtang kapin sa 10.4 per cent sa Visayas ag 8.8 per cent sa Mindanao. Sa Luzon mat’a nga guwa sa Metro Manila, sangkiri raya nga nagnaba sa 5.1 per cent.
Nagnaba man sa 9.1 porsyento ro mga pamilyang naging biktima it mga krimeng may kaangtanan sa propiyedad, halin sa 11.5 per cent ko Marso.
Kaibahan kara ro street robbery nga nagnaba sa 7.3% halin sa 8.9%, samtang ro mga insidente it burglary ukon break-in hay nagnaba sa 3.5% halin sa 4.6%.
Samtang, 1.4 per cent it mga pamilya ro may miyembrong hasakit bangud sa physical violence, mas manaba sa 1.7 per cent ko Marso.
Ginpatigayon ro survey pinaagi sa face-to-face interviews sa 1,200 adult respondents, nga may sampling error nga plus or minus 3% para sa national nga resulta ag plus or minus 6% para sa kada nagapangunang rehiyon.
