Ginpamilit it kampo ni Vice President Sara Duterte nga owa it bastante nga basehan sa umpisa pa eang ro mga pasibangud kontra sa Bise Presidente, kasunod it pagbawi it House prosecution panel sa tatlong impeachment articles.
Suno kay Atty. Salvador Paolo Panelo Jr., tagapaghambae ni Duterte, bangud kara, owa nataw-an it kahigayunan ro Bise Presidente nga pamalibaran ro mga alegasyon ag makabo-oe it pinal nga desisyon base sa ebidensya ag laye.
Sa pihak kara, ginklaru it parte it prosekusyon nga owa nagakahueugan nga gin-aku nanda nga owa it basehan ro mga ginbawi nga pasibangud. Suno kay House lead prosecutor Rep. Gerville Luistro, ginpili nanda nga i-sentro ro pagbista sa nabilin nga Article II nga may kaangtanan sa gina-alegar nga unexplained wealth ag bukon it kumpletong deklarasyon it mga propiyedad ag interes sa negosyo sa Statement of Assets, Liabilities and Net Worth (SALN).
Ginpasugtan it Senate impeachment court ko Oktubre 13 ro pagbawi sa mga artikulong may kaangtanan sa gina-alegar nga saea nga paggamit it confidential funds, bribery ag grave threats.
Ginaeauman nga magapadayun ro pagbista sa Nobyembre 9, kun sa siin, iga-atubang it depensa ro mga ebidensya angot sa nabilin nga alegasyon. Owa pa it ginpaguwa nga sentensiya ro impeachment court nga naga-abswelto kay Duterte sa mga pasibangud.
