Kumpiyansa ro parte it prosekusyon ng bastante eon ro mga dokumentaryong ebidensiya angot sa gina-alegar nga indi mapaathag nga manggad ni Vice President Sara Duterte agud nga maangkon ro conviction kara sa impeachment trial.
Raya ro ginpahayag ni Atty. Harry Sucgang, sangka dating provincial board member ag political analyst sa Aklan kasunod it pag-atras it prosekusyon sa tatlo sa ap-at nga impeachment articles, kun sa siin, ro ginpabilin hay ro Article II ukon unexplained wealth bilang nabilin nga basehan it kaso.
Ginbaton it Senate impeachment court ro pag-withdraw sa mga nasambit nga artikulo ko Oktubre 13.
Suno kay Atty. Sucgang nga mas magiging simpli ag madaling maeubtan it mga senator-judges, partikular ro mga bukon it abogado, ro pagbista kun nakasentro eon lang sa sangk artikulo.
Ginpamilit pa nana nga indi kinahangean nga pamatud-an ro tanan nga ap-at nga alegasyon agud nga masentensiyahan si Duterte, bangud nga maskin sambilog eamang hay bastante eon nga pwedeng magresulta sa conviction ag diskuwalipikasyon nana sa pagbuyot it pampublikong posisyon.
Nagpabaskog pa sigon sa parte it prosekusyon ro testimonya ni forensic financial analyst Atty. Alexander Cabrera.
Dugang pa ni Sucgang nga ro ginaboeobanta nga ₱817.87 milyon nga gina-alegar nga unexplained wealth ni Duterte ag ko anang asawang si Manases “Mans” Carpio umpisa 2022 hasta 2025 hay owa nagakasinanto ukon mabahoe ro diperensiya sa andang gindeklarang kita ag natipon nga manggad.
Nauna eon nga ginkwestiyon it depensa ro pagiging kumpleto it pilang dokumentong pinansiyal nga gingamit sa pag-usisa.
