Uman nga naghina ro piso kontra sa dolyar matapos magsarado sa panibag-ong record low nga ₱63.52 kada US dollar, adlaw it Huwebes, Oktubre 22.
Naeampasan kara ro dating pinakamanabang haega nga ₱63.361 kada dolyar nga nailista ko Oktubre 21. Sa intraday trading, umabot pa sa ₱63.545 ro pagbaeayluhan bago sangkiri nga bumawi sa pagtapos it trading.
Ginaeauman nga posibleng magpataas sa presyo it mga imported nga produkto, partikular ro langis, ro padayun nga paghina it piso ag makadugang sa pressure sa inflation. Posible man nga magtaas ro haega it piso sa pagbayad sa utang pangguwa it nasyon.
Samtang, posibleng mas mabahoe nga kantidad it piso ro mabaton it mga pamilya it overseas Filipino workers (OFWs) halin sa andang dollar remittances. Sa pihak kara, posible man nga mabawasan ro nasambit nga benepisyo bangud sa pagtaas it presyo it mga baeak-eon.
Natabu ro panibag-ong paghina it piso kadungan it pagpataas it Bangko Sentral ng Pilipinas (BSP) it policy rate nga 50 basis points ukon katunga nga porsiyentong punto sa 5.5%, bilang sabat sa naga-grabeng peligro it inflation.
Suno kay BSP Governor Eli Remolona Jr., bukon it tuyo it pagpataas it interest rate nga depensahan ro sangka partikular nga haega it piso.
Ginapabay-an it BSP nga ro merkado ro magtaeana it exchange rate apang pwede raya nga magpasilabot agud nga mabawasan ro grabeng paghueag it piso nga posibleng magpa-grabe sa inflation.
Kaibahan sa mga ginakabig nga rason it paghina it piso ro mabaskog nga US dollar ag pagkabaeaka nga pwedeng uman nga magpataas it interest rates ro US Federal Reserve kasunod it mas mataas kaysa ginaeauman nga inflation sa Estados Unidos
