TANGALAN, Aklan — Ginpaidaeum sa inquest proceedings sa Aklan Provincial Prosecutor’s Office ro sangka 34-anyos nga eaeaki nga gin-aresto it Tangalan Municipal Police Station sa gahum it search warrant sa Sitio Aboeobo, Barangay Vivo, Tangalan, aga-aga it Sabado, Oktubre 24.
Raya ro ginkumpirma ni P/Maj. Jayson Mausig, hepe it Tangalan MPS.
Ro pag-aresto hay may kaangtanan sa gina-alegar nga pageabag sa Republic Act No. 10591 ukon Comprehensive Firearms and Ammunition Regulation Act.
Ginkilaea ro suspek sa alyas nga Samuel, kun sa siin, kaibahan ro anang igkampod nga si alyas Jevoy, parehong sa legal nga edad kat ginserbi it mga awtoridad ro search warrant sa andang mga baeay.
Sa ginpatigayon nga paghaeughog, nakarekober ro mga pulis sa kusina it baeay ni Samuel it sangka kalibre .38 nga baril ag daywang magazine nga nakabutang sa sangka maisot nga bag ag gintago sa sueod it sangka bueutangan nga plastik.
Owa mat’a it nabo-oe nga kaparehong ebidensya sa baeay ni Jevoy.
Depensa ni Samuel, gin-aywan sigon kana it anang namatay nga igmanghud ro baril. Hugut man nana nga ginpamalibaran ro gina-akusa kana nga nagapinaeupok it baril sa andang lugar.
Samtang, ginpahayag man ni Jevoy nga ginsurender eon nana ro anang baril matapos maeakot ro anang igmanghud sa sangka insidente it pagpamaril.
Sa pihak nga parte, ginpahayag pa ni Mausig nga kapin sa 30 nga mga baril eon ro boluntaryong ginsurender it mga residente sa banwa it Tangalan umpisa nga ginlunsar ro Project R.T.T. ukon Restrict, Track, and Turn-in it Police Regional Office 6 (PRO-6).
Tuyo it kampanya nga matumod ag mabo-oe ro mga loose firearms ukon mga baril nga owa it nagakaigo nga rehistro, bukon it rehistrado, ukon expired eon ro lisensya sa mga barangay sa rehiyon.
Raya hay kaparte suno kana it pagtinguha it kapulisan nga mapugngan ro ilegal nga pagpanag-iya ag paggamit it mga baril ag mapabaskog ro seguridad sa mga komunidad.
