Ginsibak sa puwesto si US National Cyber Director Sean Cairncross kasunod it magkasunod nga technical disruptions nga naka-apekto sa air travel, banking services ag national security networks it Estados Unidos.
Base sa report, suportado ni US President Donald Trump ro pagkakas kay Cairncross, base sa pahayag it sangka source nga maeapit sa White House.
Temporaryong magabueos kana si Department of Defense Chief Information Officer Kirsten Davies samtang ginahueat ro kumpirmasyon it permanenteng kabaylo halin sa US Senate.
Kaibahan sa mga nailistang aberya ro temporaryong pagpundo it air travel, pagkaduea it access sa pilang Microsoft email services, pag-disturbo sa internal network it National Security Agency (NSA) ag pagka-delay it pilang banking transactions.
Dugang pa kara, ginpahayag it US Director of National Intelligence nga owa it ebidensiyang may koneksyon ro mga insidente ukon kaparte ro mga raya it koordinadong cyberattack nga suportado it ibang nasyon. Suno kana nga magkaseparado nga aberya ro mga raya nga may kaangtanan sa maintenance ag technical changes sa mga sistema.
Nagapangatubang sa batikos ro administrasyong Trump bangud sa naging pagsabat kara sa mga nasambit nga aberya. Kinahangean nga mag-agi sa kumpirmasyon it Senado ro permanenteng kabaylo ni Cairncross, nga ginaeauman nga magiging mas komplikado sa pagbag-o it kontrol sa Senado sa Enero.













