Ginpahayag it Office of the Ombudsman nga maga-agi anay sa pag-usisa ro affidavit it 18 nga gina-alegar nga dating miyembro it Philippine Marines nga naga-akusang may mga opisyal it gobyerno nga nagbaton it kwarta halin kay dating Ako Bicol Rep. Zaldy Co.
Ginpaguwa ro pahayag matapos engganyuhon ni Atty. Levi Baligod si Ombudsman Jesus Crispin Remulla nga imbestigahan ro notarized affidavit nga anang ginsumite.
Suno sa Ombudsman, ro dokumento hay bukon pa it sangka verified complaint nga naga-umpisa it pormal nga proseso.
Sa pihak kara, igapaidaeum raya sa standard evaluation agud nga sayuron kon may batante nga basehan ag hurisdiksyon para magpadayun. Pagatan-awon man ro kredibilidad it mga affiant ag ro ebidensyang kaibahan.
Gin-insister it taeatapan nga indi raya dapat nga gamiton bilang “political arena” ag magapabilin nga independent nga nakabase eamang sa ebidensya, laye, ag due process.
Nauna eon nga ginpahayag ni Baligod nga ginmandu sigon ni Co sa mga dating Marines nga maghatud it kwarta sa pilang opisyal it gobyerno. Gin-akusahan man nana sanday Co ag dating Senador Antonio Trillanes IV nga pondohan ro hotel accommodations it mga imbestigador it International Criminal Court sa kaso it war on drugs ni dating Pangueong Rodrigo Duterte.
Ginpamalibaran it ICC Office of the Prosecutor ro alegasyon ag ginpahayag nga ro andang ginagastos hay halin sa opisyal nga budget it korte ag may independent ag transparent nga accounting.
Samtang, ginpahayag it Malacañang nga tuyo it mga pasibangud nga samaran ro ICC samtang nagapadayun ro confirmation of charges hearings kontra kay Duterte sa The Hague. Ginhinyu man ni Senador Imee Marcos nga makaangkon it imbestigasyon sa mga alegasyon, kaibahan ro gina-alegar nga pagdaea it kwarta sa baeay ni Pangueong Ferdinand Marcos Jr. sa Ilocos Norte. Gintawag man it Palasyo ro akusasyon kontra sa Pangueo nga sangka “lousy script.”
