KALIBO, Aklan—Nagdihon it hagna si Aklan 2nd district congressman Teodorico Haresco Jr. nga nagatuyo nga magtukod it separadong taeatapan nga magadumaea sa daywang paeuparan sa probinsiya.
Suno kay Haresco nga gusto nana nga magtukod it bag-ong government-owned and controlled corporation (GOCC) agud nga magdumaea sa Kalibo international airport ag Caticlan airport nga parehong aeagyan it mga turista paagto sa bantog nga isla it Boracay.
Tuyo it anang house bill no. 1522 nga magtukod it Aklan Airport Authority (AAA) nga sarang nga makapatuman it mga polisiya ag programa nga may international standards.
Engkaso nga mataw-an it katumanan, ro AAA hay makaangkon it kaparehong functions sa Manila International Airports Authority, Mactan Cebu International Airport Authority, ag Clark International Airport Corporation.
Ro paeuparan sa Kalibo hay nagaserbisyo eamang sa mga turista nga naga sueod ag nagaguwa sa Boracay.
Ro AAA hay magapabilin sa idaeum it DOTr.
Ro Kalibo international airport hay parehong nagabaton it international ag domestic flights samtang ro Caticlan airport nga ginadumaeahan it Trans Aire Development Holdings Corporation, subsidiary it San Miguel Corp. hay naga-cater eamang it domestic flights.
Nagapati si Haresco nga ro anang hagna hay makabulig it mabahoe eabi pa ag balik eon sa normal ro turismo sa boracay nga kan-o eamang hay nag-eampas sa sang milyon ro mga nailistang turista.
