KALIBO, Aklan—Ginpursige ni Aklan 2nd District Rep. Teodorico Haresco Jr. sa gin-aprubahan nga Bayanihan To Recover as One Act o Bayanihan 2 nga makataeana it pondo para sa downpayment sa pagbakae it bakuna kontra sa coronavirus disease 2019 o covid 19.
Suno kana nga raya hay nagabalor it P13 billion.
Target sigon it gobyerno nga makabakae it bakuna sa Russia ukon China bangud nga ro mga advance countries kapareho it Amerika ag Europa hay bukon it interesado nga magtau it andang gina develop nga bakuna sa Pilipinas.
Madumduman nga nauna eon nga ginpasaeamatan ni Pangueong Rodrigo Duterte ro Russia ag China bangud sa andang pag offer it andang bakuna sa nasyon sa oras nga haum eon raya para sa distribusyon sa publiko nga ginaeauman sa Oktubre ukon Nobyembre.
Gindugang pa ni Haresco nga kapos sa kwarta ro Pilipinas bangud sa bagsak nga ekonomiya tuga it pandemya.
Una eon sigon sa third stage it andang trial ro mga Chinese companies nga naga-develop it bakuna kontra COVID-19 samtang ro Russia man hay paagto eamang sa andang third stage sa bakunang Sputnik V.
