KALIBO, Aklan–Ginakonsidera ni Aklan governor Florencio Miraflores ro uman nga pagpatuman it travel restrictions engkaso nga padayun nga magasaka ro kaso it coronavirus disease ukon COVID 19 sa Iloilo.
Suno kana nga ginatun-an nana makaron nga ibalik ro patakaran nga kinahangean nga magpaidaeum anay sa quarantine ro mga nagahalin sa probinsiya ag siyudad it Iloilo pag-uli sa Aklan.
Nasayuran nga kaabuan sa mga nagpositibo sa covid 19 sa nasambit nga lugar hay work-related kapareho it mga call centers ag fishing ports.
Samtang, ginpasaeamatan man it gobernador ro kooperasyon it tanan nga mga alkalde sa Aklan matapos nga nagpabor ro mga raya sa anang hinyu sa ginpatigayon nga pueong ko nagtaliwan nga domingo nga magatukod it dugang nga mga municipal isolation units bilang preparasyon sa pag-uli it dugang nga mga ROFs ag LSIs para sa mas madasig nga pag-trace, pag-test , pag-isolate ag pag-treat ukon pagbueong it mga covid positive patients.
