Padayon ro ginahimo nga mga tikang it Office of the Provincial Veterenarian (OPVET) Aklan sa pagbantay sa mga border it probinsya agud makalikaw halin sa sakit nga African Swine Fever (ASF).
Suno kay Dr. Ivy Lachica, livestock inspector, nakaset-up eon ro mga border control maeapit sa mga probinsya nga may positibong kaso it ASF.
Ginpatuman man sigon ro Executive order no. 44 series of 2026 kun sa siin may tempraryo nga pag-ban sa mga live hogs, ag mga pork products nga nagahalin sa mga lugar nga may confirmed cases.
Dugang pa nana, padayon sandang nagamonitor sa sitwasyon kun sa siin nagapatigayon sanda it blood testing sa mga may reported nga mortalities sa anadang mga alaga nga baboy para sa pag-usisa.
Sa makaron sigon, waeong ka munisipalidad ro una sa idaeom it pink zone, kaibahan eon ro banwa it Kalibo, samtang waeo man una sa idaeom it yellow zone.
Samtang ro banwa it Lezo nga dating ginpaidaeom sa Red Zone hay gina-endorso eon makaron paadto sa pink zone matapos nga mag negatibo ro blood samples nga ginbuoe sa nasambit nga banwa.
Paathag man ni Dr. Lachica, nagapabilin nga bastante ro suplay it baboy tuga eon man it bastante nga lokal nga suplay ag suplay halin sa mga probinsya nga ASF Free.
Padayon man sanda nga nagapadumdom sa mga hog raisers nga indi maging kampante ag pabaskugon ro andang pagbantay sa andang mga piggery agud nga malikawan ro pag-angkon it nasambit nga masakit sa andang mga alaga.
