KALIBO, Aklan — Ginpasiguro it Bureau of Internal Revenue (BIR)-Aklan nga dere-deretso ro andang tikang agud nga masiguro nga makakolekta it buwis nga sueod sa andang gina-target makaron nga dag-on.
Sa interview it Bombo Radyo, ginpahayag ni Ms. Rosalyn Satajo, chief it assessment section ag OIC it BIR-Aklan nga nakakolekta eon sanda it masobra sa P1.5 billion sa unang an-um nga buean it dag-on halin sa target collection nga kapin sa P3 billion para makaron nga 2025.
Makaron nga buean it Hunyo hay naga-abot eon sa haeos P208 milyon ro andang nakolekta.
Ginpahayag pa ni Satajo nga ro koleksyon hay pinaagi sa voluntary compliance ag enforcement activities nga andang ginapatigayon.
Padayun sigon ro andang monitoring sa andang mga nagapangunang withholding agents, nagapatuman it aksyon kontra sa mga tax evaders, ag naga-implementar it Oplan Kandado agud nga maabot ro target collection .
