KALIBO, Aklan—Nagapanguna ro probinsiya it Aklan sa bilog nga region 6 sa nagasunod sa mga ginplastar nga sueundanan agud nga padayun nga maging benepisyaryo it Pantawid Pamilyang Pilipino Program ukon 4Ps.
Raya hay may kaangtanan padayun nga gina-obra nga paglimpyo it Department of Social Welfare and Development ukon DSWD sa listahan it mga benepisaryo sa bilog nga nasyon.
Suno kay Beverly Salazar, provincial link it DSWD-Aklan nga base sa andang monitoring nga ginapatigayon kada daywang buean, nataeupangdan nga pila sa mga inunga nga miyembro it 4Ps hay owa eon it interes nga magtuon pag-abot sa senior high school.
Apang padayun suno kana ro andang pag engganyo nga magpadayun ro mga raya sa pag eskwela.
Sa pihak nga parte, gindugang pa ni Salazar nga maayos ro turn-out it compliance nga ginaeakipan it edukasyon nga may 6.66%; sa ikamayad nga eawas hay may 99.64%; sa family development sessions ukon FDS hay 99.05% ag deworming nga may 100%.
Ro mga inunga nga nagabaton it cash grant nga gina monitor sa idaeum it 4ps sa bilog nga Aklan nga naga-edad it tatlo hasta 18 anyos hay naga abot sa 46,445 kun sa siin ro may pinakamaabu hay sa banwa it Ibajay.
Samtang, naga abot sa 26,608 ro kabilugan nga aktibong 4Ps beneficiaries sa Aklan ag 607 ro indigenous people nga naeakip sa programa nga kaabuan hay sa banwa it Libacao ag Madalag.
