KALIBO, Aklan — Ginpaabot it Provincial Disaster Risk Reduction and Management Office (PDRRMO)-Aklan nga nakalista sanda it pitong heat-related incident sa probinsiya umpisa ko Semana Santa hasta sa makaron kun sa siin naka-eksperyensiya it grabeng init it tiempo.
Suno kay MJ Jismundo, head it PDRRMO Aklan nga puro minimal medical condition eamang ro andang gintratar nga naapektuhan it sakit nga may kaangtanan sa mainit nga paniempo nga ginaeakipan it heat exhaustion ag pagtaas it blood pressure.
Matapos suno kana nga mataw-an it paunang medikasyon hay owa eon ginkinahangean nga daehon sa ospital.
Sa pihak nga parte, gindugang pa ni Jismundo nga magdahan ro mga motorista sa andang pagbiyahe makaron nga maueanon ro paniempo tuga it low pressure area sa Eastern Visayas.
Makabig man sigon nga blessing ro pag-uean-uean bangud sa naeksperyensiyahan nga grabeng kainit ko nagtaliwan nga mga inadlaw kun sa siin nadiligan ro mga pananum ag napahagan-hagan ro kadangga nga nabatyagan it publiko.
Bangud nga maeapad ro LPA rason nga ginaeauman ro kalhit kalhit nga pag-uean hasta sa masunod nga daywang adlaw.
