KALIBO, Aklan—Naga-apela makaron ro Sangguniang Panlalawigan it Aklan kay Pangueong Rodrigo Duterte nga ikonsidera ro andang panawagan nga indi eon pagpadayunon ro plano kara nga pagpatindog it casino sa isla it Boracay.
Nakabaehag sa draft resolution ni Sangguniang Panlalawigan member Ramon Gelito nga maabo pang lugar ukon tourist destination sa nasyon nga pwedeng butangan it casino nga mas maeapit nga adtunan it mga dumueo-o kaysa sa Boracay.
Dugang pa kara nga indi man kinahang-ean it mga kapitalista it baybay ag mala-pulbos nga baeas kundi lamesa ag silya eamang para sa andang pagsugae.
Nagpanindugan man si Gelito nga bukon it kinahang-ean it Boracay ro casino bangud naga-adto sigon ro mga turista sa isla para mag-relax ag magbakasyon ag bukon it para magsugae.
Madumduman nga nauna eon nga ginkakibot it lokal nga gobyerno it Aklan ag nagkaeain-eain nga sector ro naging anunsyo ni Pangueong Duterte nga pagapasugtan eon kara ro konstruksyon it casino bangud sa kakueangan it pondo it gobyerno.
