KALIBO, Aklan—Nagapati si Aklan Vice Governor Reynaldo ‘Boy’ Quimpo nga mas mayad nga ipasaka sa korte ro isyu sa pag-kwestiyon it Sangguniang Bayan it Kalibo sa owa pagpabor it Sangguniang Panlalawigan sa pag-loan it LGU-Kalibo sa sangka bangko.
Raya hay matapos nga magpaguwa it opinyon ro Regional Director it Department of the Interior and Local Government ukon DILG regional office 6, kun sa siin, pila sa mga raya hay ginkontra ni Vice Governor Quimpo.
Nasayuran nga nagpadaea it sueat si SB member augusto tolentino sa DILG agud nga kwestiyunon ro gahum ag pag review it SP sa mga resolution ag ordinansa it Kalibo.
Ginrekomendar man it DILG nga kon bukon it pabor sa desisyon it SP hay ipasaka raya sa korte.
Sa masobra sa 691 milyon pesos nga ginaproponer nga i-loan it LGU-Kalibo, sambilog eamang sigon nga item ro andang owa ginpasugtan.
Raya hay ro pagbakae it lote sa Barangay Andagao, Kalibo nga nagabalor it 60 milyon pesos agud nga mapatindugan it building nga pagahimuon nga temporaryo nga relocation site samtang gina-construct ro Kalibo Public Market.
Ginpunto pa it bise gobernador nga saea ag malisyoso ro alegasyon nga owa nanda ginpaboran ro proyekto bangud nga ro anang misis nga si dating Congresswoman Billie Calizo-Quimpo ro nagapanag-iya it korporasyon it ACE hospital nga nahamtang sa katabok it lote nga planong pagabak-eon it LGU-Kalibo.
Makabig sigon raya nga personal nga banat ag owa it baeasihan.
Ginpasiguro pa ni Quimpo nga haum sanda nga mag atubang sa korte agud nga maplastar ro mga rason sa pagpamaeabag sa proyekto.
Dapat suno kana nga kato pa hay ginpaidaeum sa repair ag rehabilitasyon ro portion it tindahan matapos raya nga masunog may daywang dag-on eon ro nagtaliwan gamit ro mga available nga pondo.
Apang ro gusto sigon it LGU-Kalibo nga gub-on ro bilog nga tindahan ag magpa-obra it bag-ong istraktura nga matsa mall-type gamit ro kwarta nga paga-utangon kunta sa bangko.
Gindugang pa kara nga indi sanda dapat nga basueon sa napurnada nga proyekto.
