KALIBO, Aklan—Positibo ro mga Aklanon boxing players nga makaangkon it medalya sa pagsabak it mga raya sa Palarong Pambansa 2023 nga igapatigayon sa Marikina City nga maga-umpisa sa Hulyo 31.
Suno kay boxing trainor Jun Montessa, haom eon ro tatlong boksingero nga sanday James Philip Baliguat; Luke Andrew Alera ag Charlie Tolosa II nga makipagsambuwa sa mga boksingero it ibang rehiyon.
Ro tatlo hay kaibahan sa delegasyon it Western Visayas kon sa siin sanda ro nakaangkon it bueawan nga medalya ko nagtaliwan nga Western Visayas Regional Athletic Association ukon WVRAA Meet nga ginpatigayon mismo sa Aklan Sports Complex sa Brgy. Calangcang, Makato.
Ginpahayag dugang ni Montessa nga maskin uwa sanda it standard nga boxing gym ag sa binit eamang it karsada nga eapok ro ginatapakan it mga raya sa andang pagtraining hay nakit-an nana ro dedikasyon ag interes sa mga atleta nga magdaog ag makauli it medalya.
Raya suno kana ro unang kahigayunan nga pagsabak it tatlo sa Palarong Pambansa.
Si Montessa hay kapin sa 22 anyos eon nga boxing trainor ag nakaproduce eon it mga professional kon sa siin naga-eaum imaw nga mataw-an it nagakaigong boxing gym ro mga gustong maging professional boxer.
