NATIONAL News — Ginkumpirma ni Wang Fu Gui, dating kaibahan sa presuhan ni She Zhijiang, nga si Alice Guo hay sangka espiya it China, apang bukon it sangka espesyal nga espiya.
Ro nasambit nga impormasyon hay ginpaabot ni Wang sa opisina ni Sen. Risa Hontiveros.
Si Wang nga amigo ni She hay nag-iba sa presuhan sa sueod it haeos sang dag-on ag tunga.
Suno kay Wang, imaw hay ginmanduan ni She nga buytan ro pila sa mga declassified nga dokumento kara, kun sa siin nakita nana ro classified nga impormasyon angot kay Guo.
Makaron nga adlaw it Martes, ginpaguwa it Senado sa idaeum it komite ni Hontiveros ro sangka zoom interview kay Wang, kun sa siin anang ginbulgar ro mga detalye angot sa mga aktibidad it espiya it China.
Ginpangutana ni Hontiveros kun si Guo hay ginpadaea sa Pilipinas bilang espiya kat unga pa ukon ginbo-oe it gobyerno it China matapos nga maging alkalde it Bamban.
Sabat ni Wang, ro anang kampanya bilang alkalde hay gin-organisa it Chinese State Security.
Antes nga ginpakita ro interview, ginmitlang ni Hontiveros nga naghinyu sanda nga ma-interview si She pinaagi sa embahada it Pilipinas sa Thailand, apang ginpamalibaran raya bangud sa mga rason nga diplomatiko.
Si She hay presenteng naka-presu sa Thailand, ag limitado ro anang komunikasyon sa guwa.
Sa pihak kara, ginpahayag ni Wang nga nagapasaeamat si She sa Pilipinas ag haum nga makipagbueuligan sa gobyerno it nasyon.
