KALIBO, Aklan—Aminado ro nagkaeain-eain nga Tricycle Operators and Drivers Association ukon TODA sa banwa it Kalibo nga may pila sanda nga mga drivers nga owa nagatau it student fare discount.
Suno kay Federation of Kalibo Tricycle Operators and Drivers Association Incorporated ukon FOKTODAI President Johnny Damian nga ko nagtaliwan nga mga inadlaw hay nakabaton sanda it reklamo angot sa nasambit nga isyu.
Bangud kara, nagahueat sigon sanda it imbitasyon maghalin sa sangguniang bayan it Kalibo para sa posibleng pagtalakay kara kaibahan ro representante it iba pang sektor.
Gindugang pa ni Damian nga sa pinaka-ulihi nga ginpaguwa nga taripa kadungan sa pagpanaeasa it pandemya, nakaangkon sigon sanda it kasugtanan sa pagpatuman it pilang adjustments bangud sa sangkiri nga pasahero.
Ginkasugtan sigon it mga drivers nga bangud nga ap-at hasta limang pasahero eamang ro sarang nga maisakay antes nga makaguwa sa mga terminal rason nga owa eon nagatau it discount, apang kon mag-abot it an-um ro pasahero hay dikara sanda nagatau it diskwento.
Sandig sa naga-eksister nga ordinansa, ro mga driver it pampasaherong tricycle hay dapat nga magtau it 20 porsiyentong discount sa mga estudyante kamana man sa mga senior citizens ag persons with disability ukon PWD.
Apang bangud sa mahina gihapon nga kita tuga it mataas nga presyo it produktong petrolyo, rason nga ro iba hay owa nagatau it discount.
Haum suno kana sanda nga mag-atubang sa SB agud nga mabatian man ro andang explinasyon.
Mag-eowas sa SB, plano man sanda nga ipatawag it Land Transportation Office ukon LTO agud nga maintindihan ro madangatan engkaso nga ireklamo it overcharging it sangka pasahero.
Nasayuran nga ro isyu hay naka-abot eon man sa Department of Education ukon DepEd ag LTO.
