KALIBO, Aklan—Posibleng magapangatubang it kasong frustrated homicide ag slight physical injury ro sangka eaeaki matapos ro natabong pagpamuno sa ap-at ka mga indibidwal sa pabaeay sa Barangay Jugas, New Washington.
Suno kay PCL Eduardo Almerante Jr., imbestigador it New Washington PNP nga natabo ro insidente mga bandang 9:50 it gabi-e ko adlaw it Sabado.
Nauna kara nakabatun sanda it tawag maghalin sa sangka concerned citizen angot sa sigon hay pag-amok it hilong nga suspek nga ginkilaea kay Gelo Ruiz, 37 anyos ag tumandok it barangay Mangan banga apang presenteng naga-istar sa nasambitan nga lugar.
Ginapahayag nga nag-adto sigon ro suspek sa mga unit it pabaeay it mga biktima nga sanday Danilo Durdas, 49 anyos, sangka construction worker ag asawa karang si Daisy Durdas, kaibahan sanday Jonel Bernandino,22 anyos ag Jomar Villanueva, 32 anyos agud nga magpanukot kunta it andang mga baeayran sa tubi.
Apang bangud nga una idaeum it impluwensiya it makahieilong nga aeak ro suspek hay nag-ayo ro mga biktima nga pagka-agahon eun lang mabayad.
Kasunod kara hay may natabong diskusyon sa magtimbang nga parte hasta nga ko ulihi hay nagbo-oe it siyaw ro suspek nga imaw ro anang gingamit sa pagpamuno sa ap-at tanan nga mga biktima.
Sa mayad nga suwerte ag mga maisot nga lastro eamang ro naangkon it mga biktima ag gilayon man nga ginrefer sa out patient department it Aklan provincial hospital matapos nga maeapatan it nagakaigo nga pagbueong.
Nasayuran nga matapos ro insidente hay nagkaeasugot ro suspek ag pamilya it mga biktima nga mag-atubang sa barangay justice system para sa nagakaigo nga disposisyon.
