KALIBO, Aklan—Kapin sa ap-at nga katawo ro naging biktima it paeupok maghalin sa nagkaeain eain nga banwa sa bilog nga probinsya it Aklan umpisa kahapon nga adlaw, Disyembre 31 hasta kaina it agahon Enero 1, 2022.
Una kara, napiskan it paeupok nga five star ro biktimang si Sonny Saranggola, 37 anyos ag residente it Barangay Pook, Kalibo.
Nakaangkon eamang it sangkiring epekto sa anang mata ro paeupok ag ginrefer sa out patient department it Aklan Provincial hospital matapos nga maeapatan it nagakaigo nga medikasyon.
Samtang sa banwa it Balete naging biktima man it paeupok ro sangka eaeaki nga ginkilaea kay Alberto Feliciano.
Sa Agbago, Ibajay man hay aksidenteng naeokpan ro biktimang si Salido Ramon nga nagapang edaron it 51 anyos.
Samtang nagapabilin man nga confined si Melchor Casoy, 41-anyos, residente it Brgy. Mataphao, New Washington matapos nga maeukpan it whistle bomb ro anang tuo nga alima.
Ginasugid nga dungan nga ginsindihan it biktima ro daywang whistle bomb direkta sa anang alima.
Haeos ro kuma-ingking eon lang ro nabilin sa tuo nga alima it biktima tuga it mabaskog nga impact it pag-eupok.
Dugang pa kara nga una sa idaeom it impluwensya it makahieilong nga ilimnon ro biktima kat matabo ro insidente.
Gilayon pa nga ginsinggitan it anang mga kaibahan ro biktima nga buhian eon ro sambilog nga whistle bomb nga owa nag-eupok apang ulihi eon ro tanan.
