KALIBO, Aklan—Ginmanduan it lokal nga gobyerno it Banga sa pagpamuno ni Mayor Noel Redison ro Municipal Agriculture Office ukon MAO nga ivalidate ro mga indibidwal nga nagapaenrol sa Registry System for Basic Sectors in Agriculture ukon RSBSA.
Raya hay kasunod it pila ka mga reklamo it mga mangunguma nga may ginabuytan nga pormas nga uwa sigon ginapirmahan it andang punong barangay.
Angot kara, ginpahayag ni Elmar Estanislao, municipal agricultural officer nga nagapadayon ro enrolment sa RSBSA kon sa siin anda raya nga ginavalidate antes nga iencode ag ipasa sa regional office.
Apang, uwa pa sigon it reklamo nga nakaabot sa andang taeatapan ag uwa sanda nakakita it pormas nga ginareklamo it ibang aplikante.
Bangud kara, nagpaguwa sigon imaw it sueat nga nakaaddress sa mga punong barangay nga kon may una nga gustong magpavalidate hay anda raya nga pagaadtunan ag sa kamatuoran sa adlaw it Miyerkules hay nakaskedyul sanda sa barangay Muguing sa nasambit nga banwa.
