KALIBO, Aklan—Gindiffer anay it Sangguniang Bayan it Malay ro aplikasyon it PetroWind Energy Incorporation para sa andang expansion it wind turbine nga igabutang sa Brgy. Napaan, Malay.
Suno kay sangguniang bayan member Allan Palma Sr, nabilog ro desisyon matapos ro ap-at nga kahigayunan nga nagpatigayon sanda it committee hearing angot kara.
Nadiskubrehan sigon sa inspection it environmental and zoning division it lokal nga gobyerno nga posibleng maapektuhan ro mga kasubaan nga maeapit sa lugar.
Idto suno kana magadoehog ro mga eapok halin sa ibabaw it bukid ag sa kamatuoran hay naeksperyensyahan eon raya ko mga nagtaliwan nga inadlaw nga sigidas ro uean kon sa siin naging kulay tsokolate ro tubi sa Nabaoy hasta sa Napaan river.
Ginatan-aw nga may kapalpakan sa slope nga ginhimo sa unang proyekto rason nga ro doehog it mga eapok halin sa bukid hay sa nasambit gid nga kasubaan.
Uwa sigon sanda nagapamaeabag sa mga proyekto eabi eon kon makabulig sa sektor it enerhiya.
Apang, kinahang-ean raya nga tun-an it husto para maamligan ro dunang manggad it banwa it Malay.
Nasayuran nga ro Nabaoy river ro ginasandigan it tourism industry, water concessioner nga BIWC ag Boracay Tubi nga naga supply sa isla it Boracay.
