KALIBO, Aklan–Ginakasubo it Aklan Police Provincial Office ukon APPO ro hinali nga kamatayon it bagitong pulis matapos nga makaangkon it fatal nga lastro sa eawas tuga it anang pagkaaksidente sa underconstruction nga tulay sa Brgy. Mabilo, Kalibo bandang ala-1:30 it aga aga ko adlaw it Huwebes.
Suno kay Police Major Willian Aguirre, inde pa sanda makapaguwa it statement kon una sa idaeom it impluwensya it aeak si Patrolman Cesar Nedic, Jr., 27-anyos ag residente it Barangay Alaminos, Madalag bangud nga nagapadayon pa ro imbestigasyon it Kalibo police station ag Aklan Police Provincial Office Mobile Force Company kon siin imaw naassign.
Ro klaro eamang sigon makaron hay uwa nakasuksok it helmet ro pulis kat matabo ro aksidente kadungan kara ro maeasa nga daean tuga it maueanon nga panyempo.
Bilang sangka pulis kon makaruyon nga dis oras it gabie hay posibleng may transaction pa sanda sa guwa nga kaparte it trabaho.
May kaangtanan kara, ginapaabot it APPO ro kasubo ag simpatiya sa pamilya Nedic bangud sa uwa ginaeauman nga aksidente.
