KALIBO, Aklan—Ginrekomenda eon it Aklan Police Provincial Office ukon APPO ro pagpasaka it kasong administratibo partikular ro grave misconduct kontra sa police officer nga ginkasuhan it adultery bangud sa pakikipag-relasyon sa sangka public school teacher nga may asawa eon.
Suno kay Aklan Provincial Police director Colonel Ramir Perlito Perlas matapos ro insidente hay ginmandu nana sa lider it 1st mobile force nga naka-assign sa banwa it libacao nga magpatigayon it evaluation sa nasambit nga pulis nga naeakot sa eskandalo.
Ro penalidad sigon kara hay 60 days hasta 6 months suspension ukon demotion.
Apang may posiblidad man nga ma-dismiss sa serbisyo.
Bangud nga masyadong seryoso pagkasaea hay gintugyan nanda ro pagpasaka it kaso sa regional director pinaagi sa ginpadaea nanda nga report ag mga ebidensiya.
Anumang oras sigon hay igapatawag eon imaw sa regional office para sa sangka summary hearing procedure.
Ro nasambit nga pulis hay gin disarmahan, ginboe-an it badge ag presenteng naka-assign sa provincial holding administrative unit.
Ro kaso sigon hay separado pa sa criminal case nga anang ginapangatubang.
Samtang, aminado man si Col. Perlas nga nasubuan imaw sa natabu bangud nga nakatuga eon man raya it mancha sa imahe it PNP.
Ginakundina sigon nanda ro mga makarondaya nga hilimuon ag owa ginatolerar rason nga insigidang gin-aksyunan.
Nagaeaum si Perlas nga magaserbi raya nga leksyon sa iba pang police officer nga maga-abuso sa serbisyo.
