KALIBO, Aklan—Nakataeana nga magpatigayun it simultaneous checkpoint ro Aklan Police Provincial Office (APPO) sa bilog nga probinsya it Aklan kaibahan ro Commission on Elections (Comelec) bilang precautionary measures sa nagahilapit nga May 9, 2022 national and local elections.
Suno kay Police Major Willian Aguirre it Provincial Intelligence Unit it APPO, tuyo kara nga epektibong maimplementa ro firearms ban ag masiguro nga tama ro pagpatuman it search and seizure procedures sa Comelec checkpoints nga indi ma-eabag ro civil, political ag human rights.
Raya hay matapos nga gin-isyu it komisyon ro Resolution No. 10741 kung siin nakabaehag nga kinahang-ean nga may una nga maskin sambilog nga checkpoint sa kada siyudad ukon banwa.
Ro dugang nga mga checkpoint nga pagabantayan it mga miyembro it Armed Forces of the Philippines (AFP) ag Philippine National Police (PNP) sa guwa it mga siyudad ukon munisipalidad hay dapat nga ipahisayod sa mga election officer it Comelec nga may kontrol sa andang lokalidad.
Required sigon kara ro pag-angkon it maayos nga iwag ag eambong sa mga checkpoint.
Dugang pa ni Major Aguirre nga ‘visual search’ ro pagapasugtan ag bukon it required ro pagbukas it mga glove compartment, trunk ukon mga bag.
Apang, maidid sigon nanda nga pagasikyaron ro mga commuter ag traveler nga pasueod ag pagguwa it probinsya para masiguro ro maayos ag matawhay nga pagpatigayun it 2022 elections.
