KALIBO, Aklan—May lead eon ro kapulisan sa pagpatay sa sangka government bank employee nga ginbaril-patay sa Sitio Looban, Barangay Camanci Norte, Numancia ko nagtaliwan nga Oktubre 5, 2021.
Raya ro ginpahayag ni Aklan provincial police director Colonel Ramir Perlito Perlas.
Suno kana nga kabay nga maging madinaeag-on ro andang ginapatigayon nga sunod-sunod nga operasyon.
Naging madahan man sigon sanda sa pagpasaka it kaso agud nga malikawan nga raya hay mabasura.
Gusto sigon nanda nga mataw-an it hustisya ro pagkamatay it biktima.
Makabig sigon nga hired killers ro nag baril sa biktima ag planado ro insidente.
Madumduman nga insigidang namatay ro biktimang si Jonalyn Arcenio Maribojo, 41 anyos , residente it nasambit nga lugar matapos nga ginbaril it makapilang beses it owa nakilaea nga gunman samtang nagapungko sa sueod it tricycle maeapit sa water refilling station.
Nagpamalibad man raya nga ibulgar ro pagkatawo it mga ginakabig nanda nga persons of interest bangud nga basi mabulilyado ro andang ginahimo nga operasyon.
Padayun pa sigon nanda nga ginatumod ro motibo sa krimen ag ginduea ro posibilidad nga ro insidente hay may eamod pamulitika.
