KALIBO, Aklan—Nagpadumdom ro Aklan Police Provincial Office (APPO) sa publiko nga sigurduhon nga secured ro tagsa ka panimaeay antes magpanaw sa bakasyon.
Suno kay Police Lieutenant Colonel Bernard Ufano it APPO, nga dapat siguraduhon nga bue-on sa saksakan ro tanan nga appliances ag iwag para malikawan ro pagkasunog it baeay eabi pa ag masami makaron ro power interruption kamana man nga i-check it mayad ro kariton ag makina it pagagamiton nga saeakyan para malikawan ro aberya sa daeanon.
Nasayuran nga nakaugalian eon it maabo nga mga magpamilya ro magbakasyon eabi eon kada holiday season rason nga dapat ipabilin ro kaeowasan it kada isaea.
Dugang pa kara nga mas mayad gihapon kung may maaywan nga tawo sa baeay para may magatan-aw sa mga propiedad.
Kadungan kara, ginpadumdom man it pulisya ro publiko nga mag-doble dahan kontra sa mga kriminal.
Base sa crime monitoring it PNP, masami nga nagataas ro mga kaso it snatching, pagpanakaw, pagpang-hold up ag iba pang crime-related incident kada ulihing quarter it dag-on.
Engkaso sigon nga maging biktima it mga kawatan hay insigidang magpangayo it bulig sa pinakamaeapit nga estasyon it pulisya.
