KALIBO, Aklan—Naka-alerto makaron ro Aklan Police Provincial Office (APPO) kontra sa mga magapamintaha sa nagahilapit nga selebrasyon it kapaskwahan.
Suno kay Police Lieutenant Colonel Bernard Ufano it APPO, makaron nga nag-umpisa eon ro “Ber months” mabahoe sigon ro posibilidad nga umarangakada man ro mga kriminal partikular ro mga miyembro it sindikato ukon budol-budol.
Ginakabig man kara nga pinakamaeam nga klase it kriminal ro mga miyembro it budol-budol bangud sa andang diskarte ag kaabo it mga nabiktima.
Mag-eowas kara, ginatutukan man sigon nanda ro isyu it panakawan ag illegal nga droga.
Ginpadumduman pa ni Ufano ro mga pumueoyo nga likawan ro paggamit ukon pagbaligya it illegal nga droga bangud owa man raya it maituga nga mayad kundi problema eamang ag posibleng maging paeag pa sa kabuhi.
