KALIBO, Aklan—Nakalista ro Aklan Police Provincial Office (APPO) it kabilugan nga 35 ka mga police operation kontra sa illegal gambling kaeakip ro tupada ko nagtaliwan nga dag-on.
Suno kay Police Major Willian Aguirre it Provincial Intelligence Unit it APPO nga kapin sa 27 ka mga persona ro andang ginpasakaan it kasong kriminal partikular eon ro pag-eabag sa Presidential Decree 1602.
Suno kana, mas nagtaas ro numero it mga pumueoyo nga nagsueod sa iligal nga sugae umpisa nga mag-eupok ro pandemya.
Strikto sigon nga ginabawaean ro pagpatigayun it mga sugae kaibahan ro pagbueo-bueo bangud indi malikawan ro pagdueotdutan it mga tawo kamana man nga owa raya ginapasugtan it laye.
Ginpasiguro ni Major Aguirre nga sigidas ro andang monitoring sa mga kabanwahanan ag kabarangayan para masiguro nga owa eon it eakot sa iligal nga hilimuon.
Gin-engganyo man kara ro publiko nga insigidang makipag-angot sa pulisya engkaso nga may masayuran nga nagapatigayun it iligal nga aktibidad sa andang komunidad.
