KALIBO, Aklan—Suportado it Aklan Police Provincial Office (APPO) ro paggamit it body-worn cameras it mga pulis sa pagpatigayun it operasyon.
Raya hay kasunod it pagpagguwa it Supreme Court it mga polisiya sa paggamit it body camera it mga kapulisan.
Suno kay Police Lieutenant Colonel Bernard Ufano it APPO nga mabahoe rayang bulig bilang ebidensya sa parehong miyembro it operatiba ag mga sibilyan.
Mabahoe man sigon ro maibulig it video footage it body cam sa pag-file it kaso kamana man nga malikawan ro alegasyon nga planted ro ginkasa nga operasyon.
Bilang miyembro it Philippine National Police (PNP) pabor si Ufano nga magbutang it body cam agud nga makita ro matuod nga natabo eabi eon sa pagserbi it mandamiento de aresto ukon search warrant.
Sa rayang pamaagi, malikawan eon ro pag-abuso it mga pulis sa andang trabaho kamana man sa mga kriminal nga ginabaliskad ro sitwayson agud nga ibutang sa aeang-aeang ro mga law enforcement agency.
Mag-eowas kara, mabahoe man ro pakinabang it body cameras para wakasan ro mga pag-eabag sa tawhanong kinamatarong.
Kaibahan man sa ginbaeay nga polisiya it mga mahistrado nga dapat ipasayod it mga pulis sa gina-arestong suspek nga iga-serbi nanda ro warrant of arrest ag gina-rekord raya sa pamaagi it body camera.
