Ginpangunahan ni Kalibo Mayor Juris Sucro ro seremonya it pagpasaka it bandera ag paghaead it bueak para sa pagdumdum sa ika-126 anyos nga selebrasyon it Araw ng Kalayaan it nasyon makaron nga adlaw, Hunyo 12, nga ginpatigayon sa Kalibo Pastrana Park.
Kaibahan si Vice Mayor Cynthia dela Cruz ag iba pang opisyal it banwa ag mga imbitadong beterano, naghaead sanda it bueak sa Heroes Memorial Shrine para sa mga baganihan nga Akeanon pagkatapos it flag-raising ceremony.
Sa anang mensahe, ginsaysay ni Mayor Sucro ro selebrasyon it Araw ng Kalayaan hay owa eamang nakasentro sa uman nga pagdumdum sa kasaysayan halin sa mapamigos nga pagsakop it mga dumueuong sa nasyon kundi sangka kahigayunan sa mga nagapungko sa pwesto nga maghimo it mga tikang para sa pag-umwad nga ro nagapangunang katuyuan hay mahaw-as sa kapigaduhon ro mga pumueuyu.
Pinaagi suno kana sa pagbueuligan hay panigurado nga maangkon ro ginahandum nga kadaeag-an.
Samtang, ginpadumdum ni vice mayor dela cruz sa tanan ro importansiya nga tun-an ro kasaysayan bangud nga dugo, hueas, ag kabuhi it mga baganihan ro rason kun ham-an nga gina-angkon makaron it kada isaea ro kahilwayan.
Nagpasakop man sa selebrasyon ro mga opisyal ag maging ro empleyado it lokal nga gobyerno, mga barangay ag sangguniang kabataan ukon SK officials kaibahan ro iba pang ahensya it gobyerno, civil society organizations ag non-government organizations.
Ro tema makaron nga dag-on para sa selebrasyon it kahilwayan it nasyon hay ‘Kalayaan. Kinabukasan. Kasaysayan.
