Gintamyaw ni US President Donald J. Trump ro ap-at nga astronaut it Artemis II matapos ro madinaeag-on nanda nga siyam nga adlaw nga misyon sa palibot it buean ag eowas nga splashdown sa kadagatan maeapit sa San Diego, California.
Suno sa pangueo, “spectacular” ro bilog nga biyahe ag “perfect” ro naging landing it Orion spacecraft.
Ginpaabot man nana ro pagpabugae sa mga crew nga sanday Reid Wiseman, Victor Glover, Christina Koch, ag Jeremy Hansen, kamana man nga gin-imbitahan sanda nga magbisita sa White House sa mas madaling paniempo.
Dugang pa ni Trump, plano sigon nanda nga umanon ro misyon ag ro masunod nga target hay ro planetang Mars, kadungan it padayun nga suporta it gobyerno sa programang Artemis it NASA.
Ro Artemis II hay nakalista it bag-ong rekord bilang pinakamaeayong distansya nga naabot it tawo halin sa kalibutan nga nag-abot sa masobra sa 400,000 kilometro, ag nagtau it mga litrato nga bo-oe halin sa lunar orbit kaibahan ro taean-awon it “Earthset.”
Ro madinaeag-on nga pagbalik it crew hay nakikitang importanteng tikang paagto sa Artemis III, nga ginaeauman nga magadaea it mga astronaut sa ibabaw it buean sa unang kahigayunan humalin ko 1972.
