KALIBO, Aklan—Gin-engganyo ni sanggunang panlalawigan member Atty. Nolly Sodusta ro publiko nga maghimo pa it dugang nga sangag agud nga maipaabot sa national government ro pagkontra sa government-owned and -controlled corporation ukon GOCC nga klase it Boracay Island Development Authority (Bida) nga magadumaea sa Boracay.
Suno kana nga engkaso nga maging laye hay mabahoe ro magiging epekto kara sa mga maintok nga negosyante ag residente it isla.
Mag-eowas kara, pagaduea-on man it Bida ro kinamatarung ag mandato it lokal nga gobyerno it Aklan ag banwa it Malay.
Samtang, nagaeaum si Atty. Sodusta nga kon maka-abot sa senado hay pagabayluhan nanda ro pilang probisyon kara.
Nasayuran nga maskin si Aklan 1st district congressman Carlito Marquez hay nag-withdraw man it anang suporta sa Bida bill.
Madumduman nga pasado eon sa ikaywang pagbasa it Kamara ro nasambit nga proposisyon.
Raya hay sa pihak it hugut nga pagpamalibad it mga lokal nga opisyal, mga ahensiya it gobyerno ag nagkaeain-eain nga grupo sa isla.
Ro House Bill No. 9826 halin sa gintingob nga kapin sa 9 nga kaparehong bills hay nagatuyo nga magtukod it Bida bilang GOCC nga may corporate powers nga magabilog it Boracay Action Plan.
Sa idaeum it proposisyon, makaangkon ro Bida it gahum nga magsueod sa kontrata, magparenta, magbakae , magbaligya , mag-angkon , magpanag-iya ukon mag-dispose it real property sa anuman nga pamaagi.
Suno pa kana nga nauna eon nga nagpamalibad kara ro sangguniang panlalawigan ag mga miyembro it sangguniang bayan it Malay ag iba pang banwa pinaagi sa pagpasa it resolutions nga naga-oponer sa GOCC nga klase it Bida.
Sa baylo ginaduso nanda ro pagbilog it multiagency regulatory body kapareho sa Boracay Inter-Agency Task Force (BIATF).
Pila sa kontrobersiyal nga probisyon it bill hay ro pagtau it gahum sa Bida nga mag-isyu it business licenses ag building permits ag magtaeana it limit sa real property taxes nga makolekta it lokal nga gobyerno nga imaw ro nagapangunang source it income it probinsiya.
Posible man nga pagasakupon it Bida ro caticlan ag pilang parte it nabas sa kutob nga masakop it expansion it caticlan airport.
