KALIBO, Aklan—Ginpakamayad makarun it lokal nga gobyerno sa Barangay Dongon West nga ibalik sa taeatapan it Numancia PNP ro reklamo it sangka pamilya angot sa gina-alegar nga pagpangbastos it sangka eaeaki sa ana mismong kapamilya.
Suno kay Barangay Kapitan Alfredo Selvistre it Brgy. Dongon West sa nasambitan nga banwa nga indi nana puwedi nga buytan ro nasambitan nga reklamo bangud apisar nga magpamilya eamang ro imbolbado kara apang bukon it residente sa anang lugar ro ginareklamo nga persona.
Nauna kara nagpablotter ro sangka ina sa Numancia PNP matapos nga ginduro-duro it anang tiyo ro anang 9 anyos nga unga.
Kasunod pa kara hay ginkumos man it imbolbado ro dughan it igmanghod nga babayi it tagreklamo samtang nagabantay sa tindahan.
Nasayuran nga tapik eamang sa nasambitan nga pamilya ro nasambitan nga eaeaki apang masami nga nagabisita sa lugar.
Base pa sa nagaguwa nga impormasyon, una sigon sa impluwensiya it makahieilong nga aeak ro imbolbado kat nahimo kara ro nasambitan nga butang.
