KALIBO, Aklan—Kapin sa P937,000 pesos pa eamang ro naipanupod nga ayuda sa mga hog raisers nga tinamaan it African Swine Fever ukon ASF ro andang mga alagang baboy.
Suno kay Mr. Bernardino Villaruel it provincial treasurer office, sa nasambit nga kantidad hay 50 ka hog raisers ro nataw-an maghalin sa sangka barangay sa banwa it Balete; pito ro sa New Washington maghalin sa limang barangay ag siyam sa Numancia nga ginakaeakipan man it limang barangay.
Angot kara, kon anu ro nakaabot nga payroll kanda maghalin sa Office of the Provincial Veterinarian ukon OPVET Aklan hay duyon ro banwa nga insigida nanda nga ginaproseso agud nga mairelease ro kwarta.
Posible sigon nga makaron nga dominggo hay igarelease eon man ro ana it banwa it Tangalan nga nagaabot sa P1.6 milyon pesos.
Ginpahayag dugang nga posibleng kueangon ro quick response fund nga P7 milyon pesos bangud sa kaabuon it mga tinamaan it ASF virus ro andang mga alagang sapat.
Nauna eon nga ginpahayag it OPVET nga igaprayoridad ro mga hog raisers nga ro andang mga baboy hay ginpaidaeom sa culling.
