Sangka magueang nga babaye sa Nepal nga gin-eaum nga namatay sa maeapnagon nga flash flood ag mudslides ro nakit-an nga buhi makataliwan ro 10 adlaw it pag-usoy it mga rescue team.
Ginkilaea ro babaye nga si Chandika Kumari Shrestha, nga nakit-an nga buhi sa sueod it anang nahugos ag naguba nga baeay sa Betrawati, Nuwakot district.
Naka-eowas imaw pinaagi sa sangka makitid nga espasyong may hangin samtang ginapalibutan it tubi ag eapok.
Suno sa mga rescuers, nabatian nanda ro boses ni Shrestha nga nagapangayo it bulig samtang ginalibot ro lugar. Nag-abot it 45 minuto ro rescue operation bago imaw eubusan nga hapaguwa ag gindaea sa ospital.
Ginpahayag man it sangka pulis nga nag-umpisa eon ro anang pamilya sa 11-diyas nga ritwal it pagpangasubo bangud nga gin-eaum nanda nga raya hay patay eon.
Kaibahan si Shrestha sa ginatos nga missing sa Betrawati, sambilog sa mga lugar nga pinaka-grabeng nahalitan it baha. Samtang, padayun gihapon ro pag-usoy sa mga naduea, kaibahan ro Pilipinong doktor nga si Juan Carlos Manalo, samtang linibu nga iba pa ro owa gihapon nakit-an sa iba pang parte it Nepal.
