KALIBO, Aklanb—Eubus ro kalipay ag pagpasaeamat ni Kalibo sangguniang bayan member Philip Kimpo nga natuman ro ginduso nana nga proyekto kon sa siin pormal nga ginbuksan ro bag-ong pasilidad nga Baeay Pagbag-o it Kalibo ukon BPK nga nahamtang sa Brgy. Nalook sa nasambit nga banwa.
Tuyo kara nga mataw-an it kahigayunan ro mga gustong magbag-o partikular ro mga naglihis it andang daean bangud sa paggamit it illegal nga droga.
Ginpaathag ni SB member Kimpo nga ro nasambit nga pasilidad hay natuman pinaagi man sa pondo nga P5 milyon pesos maghalin sa Dangerous Drugs Board ukon DDB ag gindugangan it lokal nga gobyerno it Kalibo.
Ro pasilidad hay ginakabig nga Community Based Treatment and Rehabilitation Center kon sa siin nagapati si Kimpo nga ro tanan nga tawo hay may pagbag-o ag maayos pa ro andang kabuhi nga nauyang bangud sa illegal nga aktibidad.
Haeos masobra sang dag-on man sigon ro naging proseso antes nga naipatindog ro nasambit nga proyekto.
Samtang sa pihak nga parte, gindayaw ni Undersecretary Earl Saavedra, executive director it DDB ro naging inisyatibo it LGU nga makapatindog it kaparehas kara nga pasilidad.
Suno kana, raya ro unang Community Based Treatment and Rehabilitation Center nga gin-inagurahan makaron nga dag-on.
Gin-insister it opisyal nga mabahoe ro maibulig kara eabi eon sa mga indibidwal nga gustong magbag-o.
Prayoridad suno kana makaron nga mapasanyog ro mga programa ag proyekto agud nga mailikaw ro mga indibidwal sa paggamit it illegal nga droga.
