BORACAY, Island — Ginkilaea bilang bag-ong celebrity Tourism Ambassador it Pilipinas ro South Korean actor ag singer-songwriter nga si Seo In Guk kon sa siin makit-an nga masyado raya nga nag-enjoy sa pagtapak sa puti ag pinong baeas it Boracay nga sambilog sa mga ginabalik-balikan it mga dumueoong turista.
Raya hay kasunod it pormal nga pagpirma ni Seo In Guk ag ni Tourism Secretary Christina Garcia Frasco sa sangka Memorandum of Understanding (MOU) ko Pebrero 21 agud nga itib-ong ro Pilipinas bilang nagapangunang destinasyon sa turismo.
Sa anang pagbisita, nasaksihan ni Seo In Guk ro kaanyag it Boracay kon sa siin makit-an sa mga litrato nga ginpakigbahin it Department of Tourism nga nagpatigayon raya it pag-golf, nag-crystal kayak sa Station 1, nag-yacht tour, ag ginsamitan ro lokal nga pagkaon kaparehas it sinigang ag sisig.
Sangka kilaeang personalidad sa South Korea, nag-umpisa si Seo In Guk bilang singer ko 2009 matapos magdaog sa reality show nga Superstar K.
Mag-eowas kara, nagguwa man imaw sa mga sikat nga drama kaparehas it Reply 1997, Shopping King Louie, ag Doom at Your Service.
Bilang Tourism Ambassador, katuyuan kara nga itib-ong ro Pilipinas sa bilog nga kalibutan sa pinaagi it anang kasikatan ag pagpalangga sa nasyon.
