KALIBO, Aklan—Nasapwan eon lang nga uwa it kabuhi ro sangka bakasyunista matapos nga maeomos sa Aklan river nga sakop it Brgy. Tigayon, Kalibo.
Ginkilaea ni Jeric Alvin Eulogio, tanod it nasambit nga lugar ro biktima nga si Mark Siverio Tonido, 18-anyos, tumandok it Taguig, Manila apang presenteng nagadayon sa anang tiya nga si Evangelina Silverio sa Brgy. Aliputos, Numancia.
Ginpahayag dugang ni Eulogio nga base sa impormasyon mga alas-11:00 pa naduea sa nasambit nga suba ro biktima apang bandang alas-2:24 eon narekober ro anang eawas.
Gintinguhaan pa raya nga irevive apang uwa eon nasalbar ana nga kabuhi.
Manabaw ro suba apang posibleng nakaeosong raya sa madaeom nga parte sa pihak nga kaantiguhan man raya mag-eangoy.
Kaibahan sigon it biktima ro iba pa nana nga himata sa suba nga nagpaligos kat natabo ro insidente.
