KALIBO, Aklan–Pormal nga ginlunsar it Numancia Municipal Police Station ro gintukod nga ‘Balay Silangan’ sa bahin it Brgy. Badjo, Numancia.
Suno kay Police Major Fidel Gentallan, Chief of Police it Numancia Municipal Police Station, ro nasambit nga programa hay gintambungan it mga representante halin sa nagkaeain-eain nga ahensya it gobyerno.
Ro ‘Balay Silangan’ suno kana hay magaserbing temporaryong istaran it mga boluntaryong nagsurrender nga mga personalidad nga eakot sa mga aktibidad it iligal na droga samtang nagapaidaeom ro mga raya sa repormasyon.
Ginpahayag dugang nga sambilog man raya sa requirement kung naga-apply bilang drug cleared municipality ro sangka banwa.
Pila sa mga programang ginatao sa ‘Balay Silangan’ hay may kaangtanan sa values formation, moral recovery, physical activities, livelihood ag skills training.
Ginataw-an man ro mga drug surrenderees it bugas, cash ag livelihood assistance nga makabulig para sa padayun nanda nga pagbag-o.
Ro pagpatindog it mga ‘Balay Silangan’ sa bilog nga nasyon hay programa it gobyerno sa pagpanguna it Philippine Drug Enforcement Agency (PDEA) kaangot it kampanya kontra iligal nga droga.
Gin-umpisahan raya it PDEA ko 2018 sa pakikipagbueoligan it nagkaeain-eain nga ahensiya ag mga lokal nga gobyerno.
