KALIBO, Aklan—Owa pa it nabo-oe nga bastanteng impormasyon ro Balete Municipal Police Station agud nga matumod ro mga suspect sa pagpatay sa ex-detainee nga si George Quindong, 31 anyos ko Enero 20 it hapon sa Sitio Maeobog, Brgy. Calizo, Balete.
Kadungan kara, padayun nga nagapanawagan si Jovina Nerviol, magueang it biktima sa posibleng nakasaksi sa krimen nga magguwa ag magtau it pahayag agud nga mataw-an it hustisya ro pagkamatay it anang igmanghod.
Nakahamyang ro biktima sa andang baeay ag owa pa it schedule ro anang eubong bangud sa kakueangan it pang-gastos.
Madumduman nga samtang nagatikang ro biktima kaibahan ro inang si Visitacion kat gulping may nagaharurot nga motorsiklo halin sa andang likod ag ginbaril it maeapitan ro anang manghud nga insigida kara nga ginkamatay.
Bag-oeamang raya nga nakahilway halin sa ap-at nga buean nga pagkakulong sa Aklan Rehabilitation Center kat matabu ro krimen.
