KALIBO, Aklan — Bangkay eon kat makit-an ro sangka 37 anyos nga eaeaki nga naga-eutaw-eutaw sa suba nga sakop it Sitio Ilawod, Brgy. Bakhaw Sur, Kalibo, agahon it Sabado, Hulyo 27, 2024.
Nakilaea ro biktimang si Francis dela Cruz alyas “Bongbong”, ag residente it nasambit nga lugar.
Ginasugid nga antes nga naduea ro biktima ko nagtaliwan nga Hulyo 25 hay may naka-away pa raya sa lamay it sangka namatyan sa Oyo Torong St. Kalibo bangud sa owa pagka-ilintindihan sa taya sa hampang nga “cara y cruz”.
Agud nga makalikaw sa gulo, ginasugid nga ginsampit ro biktima it anang amigo nga mag-uli eon.
Nagsunod man sigon raya, apang matapos nga maihatud ro anang amigo nga si alyas Ronmar hay natukiban nga owa raya naka-abot sa andang baeay.
Sangka pares it tsinelas nga ginapatihan nga ginapanag-iyahan ni dela Cruz ro nakit-an sa estaka sa kilid it suba.
Nagapatigayon pa it dugang nga imbestigasyon ro mga awtoridad sa natabu.
Partikular nga ginatumod makaron it Scene of the Crime Operatives (SOCO-Aklan) kon may senyales it foul play sa narekober nga bangkay eabi pa ag may nakita nga mga “patak” it dugo sa nasambit nga lugar.
Nagapati man ro kapulisan nga makabo-oe it dugang nga ebidensiya sa pilang mga footages halin sa CCTV camera maeapit sa lugar.
