KALIBO, Aklan–Natigayon eon nga mauli ro bangkay ni dating prime minister Shinzo Abe sa Tokyo, Japan sa mismong residensya kara matapos nga igahatod it motorcade kaibahan ro anang asawa.
Si Abe hay ginbaril samtang nagapatigayon it political campaign event ku nagtaliwan nga Biyernes it agahon sa southern city it Nara.
Ginpahayag ni Bombo International Correspodent Josel Palma it Japan nga nagtipon-tipon ro mga miyembro it Liberal Democratic Party (LDP) ag mga taga suporta ni Abe para pagahueaton ro pag-abot it bangkay kara para magtao it respeto.
Suno pa kay Palma nga apisar sa masubo nga natabo sa dating prime minister hay padayon sa gihapon ro nakataeana nga eleksyon makaron nga adlaw sa upper house chamber.
Base sa imbestigasyon it katapu it kapulisan, kaeain it buot kontra sa sangka “specific organisation” ro naging rason it suspek nga si Tetsuya Yamagami sa pagpamaril nga ginhimu.
Nagapati sigon raya nga si Abe hay kaparte it nasambit nga organisasyon.
Ginaeauman man ro pagbisita it presenteng prime minister nga si Fumio Kishida sa burol ni Abe.
Samtang, nakataeana man sa adlaw it martes, Hulyo 12, 2022 ro eubong it dating prime minister Shinzo Abe apang antes kara sangka night vigil man ro pagahimuon sa Lunes.
Sa makaron, pagadaehon si Yamagami sa Prosecutors office para pormal nga mapasakaan it kasong Murder.
