KALIBO, Aklan—Bangud sa atrasadong bayad it Department of Public Works and Highways ukon DPWH rason nga mahinay man ro andang pagsaylo ukon pagbo-oe it mga poste it kuryente nga naapektuhan it ginpatigayon nga road widening projects.
Suno kay Engr. Jude Ropa, Engineering Department manager it Aklan Electric Cooperative ukon Akelco nga ro nasambit nga isyu hay problemang ginapangatubang makaron it mga electric cooperatives sa bilog nga nasyon.
Sa pihak kara, ginpaabot ni Engr. Ropa nga sa kabilugan nga 789 nga power lines ag electric posts nga kinahangean nga ma-relocate, 234 eon ro andang natapos.
Kaeabanan sa mga raya hay nahamtang sa western side it Aklan kun sa siin ko 2019 pa nag-request it pondo.
Engkaso nga makompleto ro bayad, posibleng sa sueod it sang dag-on ag tunga hay matapos ro relocation it mga apektadong pasilidad.
Sa pihak nga parte, pending pa suno kay Engr. Ropa ro relocation ag removal it 635 nga mga poste maghalin sa Pook paagto sa Dumaguit bangud nga ginpangayuan pa nanda raya it budget makaron sa DPWH.
Aminado man ro Akelco nga kinahangean nanda nga masabat eagi ro concern angot sa mga poste it kuryente nga sabeag sa mga national highway bangud nga makabig raya nga takaw-aksidente.
