KALIBO, Aklan— Ginkasuhan eon it National Bureau of Investigation (NBI) ro dati ag presenteng mga opisyales it banwnag Malay bangud sa bukon it eksaktong paggamit sa milyun-milyong koleksyon sa environmental fees halin sa mga turistang nagbisita sa Isla it Boracay halin ko 2009 hasta it 2017.
Gindihon it NBI sa Office of the Ombudsman ro kasong graft ag malversation kontra kay suspended Malay Mayor Ceciron Cawaling; former Mayor John Yap; former Vice Mayor Wilbec Gelito kaeakip eon ro 18 iba pang former ag incumbent councilors.
Kaibahan man sa ginkasuhan ro municipal treasurer nga si Dediosa Dioso ag 11 town collectors.
Base sa report, ginpresentar it NBI-National Capital Region (NCR) nga uwa sigon nagamit it eksakyo ro koleksiyon it banwa sa environmental ag administration fees (EAF) kon siin nakaangkon it masobra sa Php30,678,920.73 nga discrepancy halin ko 2012 hasta it 2017 kasunod sa report nga ginsumiter it daywang treasury officials.
Samtang, nag-abot man sa Php84,860,570 ro nakit-ang discrepancy it NBI sa report nga ginsumiter it municipal tourism office sa parehong period.
Ro imbestigasyon it NBI hay kasunod it papasarado sa Isla it Boracay ko Abril 26 bangud sa mga environment issues nga mismong si Pangueong Rodrigo Duterte ro nakataeopangod.
