KALIBO, Aklan — Mabahoe ro posibilidad nga maka-host ro banwa it Kalibo it sangka National Boxing Competition eabi eon sa nagahilapit nga selebrasyon it Sto. Niño Ati-atihan Festival 2024.
Raya ro ginpahayag ni Sangguniang Bayan Bember Philip Yerro Kimpo kasunod it pagbakae it modernong klase it boxing ring it lokal nga gobyerno it Kalibo nga madali nga i-assemble.
Madumduman nga nauna eon nga nagpaguwa it direktiba si Mayor Juris Sucro nga ginabawae ro pag-parking it mga saeakyan sa sueod it Magsaysay Park sa gintaeana nga oras agud nga magamit ro lugar para sa sports activities it mga pamatan-on.
Dugang pa ni SB Kimpo nga raya hay nataw-an it daean matapos nga mabuhay eon nga partner it LGU-Kalibo ro Philippine Sports Commission.
Pinaagi sa pagpabaskog sigon it sports nga boxing sa barangay level hay mabahoe ro tsansa nga maka-usoy it mga bag-ong talent ag uman nga mapaeapad ro interes it mga Kalibonhon sa sports nga boxing sa pagpatigayon it mga boxing competition.
Samtang, ginpaabot pa it opisyal nga nagpromisa ro Association of Boxing Alliances in the Philippines ukon ABAP nga magatau it libreng training sa mga interesadong coaches and trainers sa Kalibo nga igapadaea sa Cebu.
