KALIBO, Aklan—Nakalista eon it kaso it African Swine Fever ukon ASF ro banwa it Lezo.
Raya hay matapos nga nagpositibo sa virus ro blood sample nga nabuoe sa ap-at ka baboy it sangka hog raiser sa Brgy. Agcawilan, Lezo.
Suno kay Deserie Urquiola it Municipal Agriculture Office it LGU Lezo nga antes pa man nagreport sa andang taeatapan ro hog raiser hay may daywa eon sandang ka baboy nga namatay ag gin-eobong.
Nataeopangdan eon lang sigon ro mga sapat nga gulping nag-eoya, uwa nagkaon ag nakitaan it mga rashes sa eawas nga sintomas it ASF.
Sa pag-usisa it andang taeatapan hay gilayon nanda nga ginboe-an it blood sample ro mga baboy ag nasayuran ko ulihi nga tinamaan ro mga raya it virus.
Samtang sa pihak nga parte, ginkumpirma ni Urquiola nga kapin sa 11 ka mga baboy ro naintercept it mga kapulisan it Lezo PNP station sa Brgy. Carugdog sa nasambit nga banwa.
Ro nasambit nga mga baboy hay ginpamakae sa hog raiser man sa nasambit nga lugar apang nataeopangdan nga illegal ro andang operasyon ag uwa it mga nagakaigong permit halin sa andang taeatapan.
Angot kara, nag-apela si Urquiola sa mga nagapamakae it baboy nga ibutang sa eksakto ro tanan bangud nga uwa sanda naila nga sa andang banwa magahalin ro virus eabi eon makaron nga may kaso eon it ASF ro munisipalidad it Lezo.
